Weiss leider gad kei passendi überschrift ;)

 

Noch Sydney ischs leider wieder normal wiitergange mit schuel. Aber zum Glück isch d’schuel amel am mittag scho fertig. Noch de schuel goni meistens ad lagune go sünnele, chille und mengmol machi döt au no mini huusufgobe.. ;) Am obig goni wieder hei, weli gnau weiss das e guets nachtesse uf mi wartet. I mag mengmol chum alles esse. Und chum bini fertig chunt scho de dessert. Aso mit andere Wort, i wird so richtig verwöhnt do une und mue luege dasi kein ranze überchum.

 

 

I ha scho immer mol wele skydive. Den hani min entschluss gfasst do in Airlie Beach zgo, wo e wunderschöni ussicht uf Whitsunday hesch, mit dem wiise strand, türkisblaue wasser und em korallereef wot gsehsch dur s’wasser schimmere. Also bini am sunntig 01.Juni go skydive.      Zerst hani e chlini instruktion becho, was ich wenn mue mache. Nochher isches mit em flugi ab uf 14‘000ft. So hani no en 15min rundflug über Whitsunday chöne gnüsse. Uuuund den isches los gange. D’türe isch ufgange und de erst isch usegumpet und den isch au bi mir s’mulmige gfühl ufcho. Zack de zweit isch au dusse und ez chum ii…. aso i mue sege so öpis chani nie elei mache. I bruch eine womi useschupft. xD Du gumpsch use und rasisch eifach vollgas ufd erde zue. Die erste paar sekunde isch mis herz glaub dobe im flugi blibe, aber ha mi den schnell „beruhigt“ und die restliche 40sek im freie fall chöne gnüsse. Denn isch de Fallschirm ufgange und mir sind 5min über de Whitsunday kreist und nochher sicher glandet. Es isch würkli unbeschrieblich schön gsi. I empfehls jedem mol zmache. Wenn mi öper nochem sprung gfroget het ob ichs nomol mach heti nei gseit. Aber ez im nochhinein mueni sägä dasis wieder mol mach.

 

 

Am Mittwoch 04.06.14 simmer 4te statt id schuel zu brendl’s wild farm. Da isch e Stund autofahrt gsi vo Airlie Beach. Irgendwo im nirgendwo. Aso die schwiiz mue mir nie me eine sege mir sind do am arsch vode welt. Wel z’australie gsehsch den würkli mol was heisst wiit weg vode zivilisation z’lebe. Döt acho hemmer de Bob Brendel au barfoot man gnannt im Wald ahtroffe. Döt het er üs insekte zeigt wot würkli e guets aug defür muesch ha dases gsehsch, wie z. B. stabheuschrecke. Er het au sini istellig zu de natur, klimaerwärmig usw. gseit. Wers interessiert chami gern froge oder selber zu im go. Ha kei lust zum alles ufschriebe und vorallem chas den nöd heisse ii denk au so… Noch de insekte isches wiiter gang uf sin Hof mit reptilie. Döt hemmer die zweit giftigst Schlage vo Australien chöne vo nöch betrachte. Nei es isch nöd gföhrlich gsi. Er het gseit die Schlangene seget taub und sehbehindert. Aso es mös würkli blöd go das die so eini bisst. Er hät üs nochher au zeiget a wa dasmo erkennt ob d’schlage giftig isch oder nöd. Denn hemmer dörfe zwei schlange hebe und er het nochli züg verzellt. Nochdem simmer wiiter zumene chäfig. Döt hemmer den dörfe en Koala hebe und knuddle. xD Nochher simmer zum höhepunkt gange. Fuettere und rodeo mit de Krokodil. Er isch in haag ine und het s’krokodil vo hand gfüetteret. Nochdem isch er ufs krokodil ghocket und het „gspielt“ mitem. Ajo, s’krokodil isch öpe 6m lang gsi. Und wenn e krokodil gsehsch wo mitem muul offe sünnelet oderso, chasch druff go das es e wibili isch..! ;) Zum Abschluss hemmer no dörfe e baby krokodil hebe. Im ganze isches en tolle und erlebnisriche tag gsi.

 

 

Do mir am mentig 09. Juni frei gha hend weg de queen ihren geburtstag, hend mini gasteltere e BBQ für alli studente gmacht. Es isch mega guet gsi und alli sind so richtig verwöhnt worde

 

Kommentar schreiben

Kommentare: 0